अर्थमन्त्री वाग्ले विश्व बैंकको निमन्त्रणामा अमेरिका प्रस्थान

अर्थमन्त्री डा. स्वर्णिम वाग्लेको नेतृत्वमा नेपाली प्रतिनिधिमण्डल दुईदिने भ्रमणका लागि अमेरिकाको वासिङ्टन डीसी प्रस्थान गरेको छ। विश्व बैंक समूहका अध्यक्ष अजय बङ्गाको निम्तोमा प्रतिनिधिमण्डल शुक्रबार राति काठमाडौँबाट गएको हो।

भ्रमण असोज १९ र २० गते अर्थात् अक्टोबर ५ र ६ मा हुने छ। अर्थमन्त्री वाग्लेले विश्व बैंक, अमेरिकी अर्थ मन्त्रालय र अमेरिकी अन्तर्राष्ट्रिय विकास वित्त निगमका उच्च अधिकारीसँग भेटवार्ता गर्ने कार्यक्रम छ। निजी क्षेत्रका प्रमुख लगानीकर्तासँग पनि छुट्टै भेटवार्ता तय भएको छ।

हालै भोटेकोशी क्षेत्रमा आएको बाढीले क्षति पुर्‍याएका भौतिक तथा आर्थिक पूर्वाधारको पुनर्निर्माणका लागि थप सहायता जुटाउनु छलफलको मुख्य विषय हो। विपद् सहन सक्ने पूर्वाधार निर्माणमा सहयोग बढाउने विषय पनि एजेन्डामा परेको छ। वित्तीय कारबाही कार्यदलको निगरानी सूची अर्थात् ग्रे सूचीबाट नेपाल बाहिरिने विषयमा पनि छलफल हुने छ।

बृहत् आर्थिक सुधार र द्विपक्षीय सहयोग विस्तारका विषय पनि भ्रमणमा समेटिएका छन्।