मन्त्रिपरिषद्का पाँच निर्णय: नर्वेको अनुदान, वैकल्पिक विकास वित्त नियमावली, नयाँ सचिव

मन्त्रिपरिषद्को सोमबारको बैठकले नर्वे सरकारबाट आउने अनुदान सहायता स्वीकार गर्ने निर्णय गरेको छ, जुन नगरपालिकाहरूमा स्वच्छ ऊर्जा रूपान्तरण प्रवर्द्धन गर्ने कार्यक्रममा खर्च हुनेछ। सरकारका प्रवक्ता तथा शिक्षा तथा खेलकुदमन्त्री सस्मित पोखरेलका अनुसार यो सहायता करिब १० करोड रुपैयाँ बराबरको छ। सिंहदरबारमा बसेको बैठकले कुल ५ वटा निर्णय गरेको प्रवक्ता पोखरेलले बैठकपछि जानकारी दिनुभएको छ।

बैठकले वैकल्पिक विकास वित्त परिचालन नियमावली, २०८३ स्वीकृत गरेको छ। त्यस्तै, नेपाल इन्जिनियरिङ सेवाको गठन, समूह तथा श्रेणी विभाजन र नियुक्तिसम्बन्धी नियमहरूको दोस्रो संशोधन, २०८३ लाई पनि बैठकले अनुमोदन गरेको छ। प्राविधिकतर्फका सहसचिव पद्मकुमार मैनालीलाई नेपाल इन्जिनियरिङ सेवा समूहीकरणतर्फको सचिव पदमा बढुवा गर्ने निर्णय भएको छ।

बढुवासँगै उहाँलाई पूर्वाधार विकास मन्त्रालयमा पदस्थापन गरिएको छ। सो मन्त्रालयका सचिव गोपालप्रसाद सिग्देलले असोज १३ गते अवकाश पाएपछि असोज १४ देखि मन्त्रालयमा नियमित सचिव थिएनन्। सिग्देलको अवकाशपछि मैनालीले नै निमित्त सचिवको जिम्मेवारी सम्हाल्दै आउनुभएको थियो।

बैठकले पूर्वन्यायाधीश बाबुराम रेग्मीको अध्यक्षतामा गठित समितिले बुझाएको प्रतिवेदन आवश्यक कारबाहीका लागि गृह मन्त्रालयमा पठाउने निर्णय पनि गरेको छ।