बाढीपछिको पुनर्निर्माणमा पाँच खर्बभन्दा बढी चाहिने, सडक र पुलको डिजाइन फेरिँदै

भदौ १० गते रसुवाको भोटेकोशी र असोज ८ देखि ११ गतेसम्म कालीगण्डकीमा बाढी आएको थियो। त्यसले सडक र पुलमा ठूलो क्षति पुर्‍याएपछि सरकारले तिनको डिजाइन परिमार्जन गर्ने तयारी थालेको छ। पूर्वाधार विकास मन्त्रालयका सहसचिव भीमार्जुन अधिकारीले सोमबार काठमाडौँको एक कार्यक्रममा यसबारे बोल्नुभएको छ।

नेपाल पूर्वाधार पत्रकार समाजले आयोजना गरेको कार्यक्रममा उहाँले डिजाइन कोड पुनरवलोकन गर्नुपर्ने बताउनुभएको छ। उहाँका अनुसार बाढी र पहिरोले सडक र पुलमा वर्षेनि अर्बौँ रुपैयाँको क्षति गरिरहेको छ। जलवायु परिवर्तनले गर्दा विपद्को प्रकृति र आकार अनुमान गर्न कठिन भएको उहाँको भनाइ छ।

बाढीमा पानीसँगै लेदो र ठूला ढुंगा बग्न थालेकाले माथिल्लो तटीय क्षेत्रमा फरक डिजाइन चाहिने अधिकारीले बताउनुभएको छ। विपद्मा केन्द्रित मर्मतसम्भार तथा उत्थानशील इकाइ खडा गर्ने गृहकार्य पनि मन्त्रालयले अघि बढाएको छ। यसैबीच, प्रधानमन्त्री वालेन्द्र शाहको अध्यक्षतामा सोमबार विपद् जोखिम न्यूनीकरण तथा व्यवस्थापन राष्ट्रिय परिषद्को २१औँ बैठक बसेको छ।

प्रभावित क्षेत्रको पुनर्निर्माण र पुनःस्थापनाका लागि पाँच खर्ब रुपैयाँभन्दा बढी चाहिने परिषद्ले जनाएको छ। विभिन्न मन्त्रालय र निकायबाट आएका ५०४ योजनाका लागि करिब ५ खर्ब ५९ अर्ब रुपैयाँ स्वीकृत गर्न परिषद्ले अर्थ मन्त्रालयमा सिफारिस गरेको छ। लागत नखुलेका आयोजनाको विवरण आएपछि बजेट सिफारिस गर्न राष्ट्रिय विपद् जोखिम न्यूनीकरण तथा व्यवस्थापन प्राधिकरणलाई निर्देशन दिइएको छ।