कांग्रेस प्रवक्ता देवराज चालिसेद्वारा उपसभापतिमा उम्मेदवारी घोषणा

नेपाली कांग्रेसका प्रवक्ता देवराज चालिसेले पार्टीको १५औँ महाधिवेशनमा उपसभापति पदमा उम्मेदवारी दिने घोषणा गरेका छन्।

महाधिवेशन चलिरहेको काठमाडौँको खुलामञ्चमा सोमबार पत्रकारहरूसँगको संवादमा उनले आफ्नो उम्मेदवारी घोषणा गरेका हुन्।

चालिसेले आफू १४औँ महाधिवेशनमा सहमहामन्त्रीको उम्मेदवार बनेको र विशेष महाधिवेशनपछि पार्टी प्रवक्ताको जिम्मेवारी सम्हालिसकेकाले अब उपसभापतिमा उम्मेदवार बन्ने बताए। विशेष महाधिवेशनपछि उनी पार्टी प्रवक्ताको जिम्मेवारी सम्हाल्दै आएका छन्।

कांग्रेसको १५औँ महाधिवेशन आइतबारदेखि काठमाडौँमा सुरु भएको हो र विभिन्न पदका लागि उम्मेदवारी घोषणा जारी छ।