गैरदलीय स्थानीय निर्वाचन र विदेशमा रहेका नेपालीलाई मताधिकार माग्दै उज्यालो नेपालको ज्ञापनपत्र

उज्यालो नेपाल पार्टीले आसन्न स्थानीय तहको निर्वाचन गैरदलीय प्रणालीबाट गराउन र विदेशमा रहेका नेपाली नागरिकलाई मतदानको अधिकार सुनिश्चित गर्न माग गर्दै निर्वाचन आयोगमा ज्ञापनपत्र बुझाएको छ। पार्टी अध्यक्ष कुलमान घिसिङले प्रमुख निर्वाचन आयुक्तसमक्ष उक्त ज्ञापनपत्र बुझाएका हुन्।

ज्ञापनपत्रमा वैदेशिक रोजगारी, अध्ययन, व्यवसाय तथा अन्य प्रयोजनका लागि विदेशमा रहेका नेपाली नागरिकलाई आफ्नो स्थायी ठेगाना रहेको स्थानीय तहको निर्वाचनमा मतदान गर्न पाउने व्यवस्था गर्न पार्टीले माग गरेको छ।

आयोगमा ज्ञापनपत्र बुझाएर फर्किँदै गर्दा सञ्चारकर्मीहरूसँग कुरा गर्दै अध्यक्ष घिसिङले कुनै पनि पार्टीसँग एकताको सम्भावना नरहेको बताए। हर्कसँग मिल्नेबारे सोधिएको प्रश्नमा पनि उनले सम्भावना नरहेको जवाफ दिएका थिए।

उज्यालो नेपाल पार्टीको यो माग स्थानीय तहको निर्वाचनको तयारीका सन्दर्भमा आएको हो।