नेकपाको महाधिवेशन स्थानीय चुनावपछि, कात्तिक ७ देखि राष्ट्रिय जागरण अभियान

नेपाली कम्युनिस्ट पार्टी (नेकपा) ले आफ्नो राष्ट्रिय महाधिवेशन स्थानीय तहको निर्वाचनपछि मात्र गर्ने निर्णय गरेको छ। पेरिसडाँडामा शुक्रबार बसेको केन्द्रीय संयोजन समितिको बैठकले पुस ११ गते देशभरका सबै वडामा एकै दिन वडा अधिवेशन गर्ने तय गरेको छ। सबै महानगर, उपमहानगर, नगर र गाउँपालिकाको अधिवेशन माघ १५ गते एकैसाथ हुनेछ।

जिल्ला, प्रदेश र राष्ट्रिय महाधिवेशनको मिति भने तोकिएको छैन। प्रवक्ता प्रकाश ज्वालाका अनुसार तल्लो तहका अधिवेशनदेखि नै युवा सहभागिता बढाउने निर्णय पनि भएको छ। पार्टीले यसअघि मंसिरमा महाधिवेशन गर्ने कार्यतालिका ल्याए पनि बाढीपहिरो र राजनीतिक घटनाले त्यो अवरुद्ध भएको जनाएको छ।

बैठकले कात्तिक ७ देखि मंसिर २५ सम्म 'राष्ट्रिय जागरण अभियान' चलाउने निर्णय पनि गरेको छ। कात्तिक ७ मा बृहत् पत्रकार सम्मेलन गरेर अभियानको उद्घाटन गरिनेछ। अभियानमार्फत सदस्यता नवीकरण, संगठन सुदृढीकरण, महाधिवेशन तथा स्थानीय तह र प्रदेशको निर्वाचनको तयारी गरिने प्रवक्ता ज्वालाले बताउनुभएको छ।

वरिष्ठ नेता झलनाथ खनालले घोषणा गरेको 'समाजवादी जागरण अभियान' बारे उहाँकै उपस्थितिमा छलफल गर्ने टुंगो भएको प्रवक्ताले जनाउनुभएको छ।