प्रधानमन्त्री शाहको भारत भ्रमणको मिति तय भएको छैन: परराष्ट्र मन्त्रालय

परराष्ट्र मन्त्रालयले प्रधानमन्त्री बालेन्द्र शाह (बालेन) को भारत भ्रमणको मिति अहिलेसम्म तय नभएको जनाएको छ। सिंहदरबारस्थित मन्त्रालयमा शुक्रबार आयोजित पत्रकार सम्मेलनमा मन्त्रालयका प्रवक्ता लोकबहादुर पौडेल क्षेत्रीले यो जानकारी दिनुभएको हो। प्रवक्ता क्षेत्रीका अनुसार नेपाल र भारत दुवै पक्षलाई सुहाउने समय हेरेर प्रधानमन्त्रीको उच्चस्तरीय भ्रमण हुनेछ।

भ्रमणको तयारीमा मन्त्रालयले गृहकार्य जारी राखेको र यस्ता भ्रमणको तयारी निरन्तर चलिरहने उहाँले बताउनुभएको छ। मिति टुंगो लागेपछि त्यसको औपचारिक जानकारी सार्वजनिक गरिने प्रवक्ताले स्पष्ट पार्नुभएको छ। मन्त्रालयले यसअघि नै भ्रमणका क्रममा दुई देशबीचको पारस्परिक हित र सहकार्यका विविध विषयमा छलफल हुने गरी एजेन्डा तयार पारिरहेको जनाएको थियो।

भारत भ्रमणबाहेक अन्य उच्चस्तरीय भ्रमणको तयारी र एजेन्डामा पनि मन्त्रालयले काम गरिरहेको प्रवक्ता क्षेत्रीले जानकारी दिनुभएको छ।