स्विस हिमनदीले यस वर्ष रेकर्डमै दोस्रो ठूलो परिमाणमा बरफ गुमाए

स्विट्जरल्यान्डका हिमनदीले यस वर्ष आफ्नो कुल बरफको करिब ५.५ प्रतिशत गुमाएका छन्, जुन अभिलेखमै दोस्रो ठूलो वार्षिक गिरावट हो। ग्लामोस नामक स्विस हिमनदी अनुगमन सेवा र स्विस विज्ञान एकेडेमीले बिहीबार जारी प्रतिवेदनमा यस्तो उल्लेख छ। प्रतिवेदनअनुसार गर्मीको लहर र जाडोमा कम हिमपात यो क्षतिका मुख्य कारण हुन्।

पछिल्ला पाँच वर्षमा मात्रै देशको हिमनदीको बरफ झन्डै पाँचौँ भागले घटेको छ। विज्ञहरूका अनुसार हालका वर्षमा बरफ पग्लने गति झन् तीव्र बनेको छ। आल्प्स क्षेत्रमा सबैभन्दा धेरै हिमनदी स्विट्जरल्यान्डमै छन्।

ग्लामोसका प्रमुख तथा हिमविज्ञानका प्राध्यापक म्याथियास हसले यस्तो अवस्थामा आल्प्सका हिमनदी लामो समय टिक्न नसक्ने चेतावनी दिनुभएको छ। उहाँका अनुसार अहिलेको तापक्रम वृद्धि पूर्ण रूपमा मानवीय गतिविधिजन्य जलवायु परिवर्तनको परिणाम हो। मानव उत्सर्जन र जीवाश्म इन्धनको प्रयोग नभएको भए यस्तो तापक्रम वृद्धि नहुने उहाँको भनाइ छ।

हिउँले पुरानो बरफलाई पग्लनबाट जोगाउने भएकाले जाडोमा पर्याप्त हिउँ नपर्नु हिमनदीका लागि विशेष चिन्ताको विषय भएको उहाँले बताउनुभएको छ। युरोप विश्वमै सबैभन्दा छिटो तातिरहेको महादेश भएकाले यो प्रतिवेदनले चिन्ता थप बढाएको छ।