थिमिमा जिब्रो छेड्ने जात्रा, भक्तपुरमा इन्द्रायणी भित्र्याएर मेला सकियो

इन्द्रजात्राको भोलिपल्ट मध्यपुरथिमिमा परम्परागत जिब्रो छेड्ने जात्रा मनाइएको छ भने भक्तपुरमा इन्द्रायणी देवतालाई देवगृहमा भित्र्याएर इन्द्र दहको मेला सम्पन्न भएको छ। मध्यपुरथिमि नगरपालिका–४ बालकुमारीका ३९ वर्षीय वीरेन्द्रभक्त गजू श्रेष्ठले यस वर्ष पाँचौँ पटक जिब्रो छेडाउनुभएको छ। दिगुटोलस्थित दिगभैरव अगाडिको डबलीमा कर्मी नाइके बाबुकाजी श्रेष्ठले करिब १० इन्च लामो तीन चुच्चे फलामे सियोले उहाँको जिब्रो छेडिदिनुभएको हो।

त्यसपछि उहाँले महाद्वीप अर्थात् भेय् बोकेर खाली खुट्टा बालकुमारी, सिद्धिकाली, भीमसेन चोक र भुलाँखेल हुँदै टोलटोल परिक्रमा गर्नुभएको छ। करिब ३५० वर्ष पुरानो मानिने यो जात्रा आर्थिक अभावले बेलाबेला रोकिँदै आएको छ र २०७४ सालमा ११ वर्षपछि पुनः सुरु भएको थियो। जात्रा सञ्चालनमा करिब छ लाख रुपैयाँभन्दा बढी खर्च लाग्ने गरेको छ।

भक्तपुरमा खौमाको देवगृहबाट इन्द्रायणीको मूर्ति खटमा राखेर सिद्धपोखरी अर्थात् इन्द्र दहमा पुर्‍याइएको थियो। पूर्णिमाको दिन दहमा स्नान र इन्द्र पूजा गर्न दर्शनार्थीको भिड लागेको थियो। संस्कृतिविद् प्रा.डा.

पुरुषोत्तमलोचन श्रेष्ठका अनुसार देवतालाई नगर परिक्रमा गराएर देवगृहमा फर्काएपछि मेला सकिएको हो। काठमाडौँको इन्द्रजात्रामा यस वर्ष २४ वर्षपछि पञ्जरां दागिं निकालिएको छ। नेवाः बौद्ध परम्पराअनुसार नरां पञ्जरां दान गर्ने व्यक्तिलाई इन्द्रसरह मानिने बौद्धविद् प्रा.डा.

नरेशमान बज्राचार्यले बताउनुभएको छ। यसपटक चमतिका पूर्णकाजी डंगोलले उक्त दान सम्पन्न गर्नुभएको छ।