मापदण्डविपरीत इन्टरनेट सेवा बेच्ने १४ आईएसपीलाई जनही ५० हजार रुपैयाँ जरिवाना

नेपाल दूरसञ्चार प्राधिकरणले आफ्नो निर्देशन र स्वीकृत मापदण्डविपरीत इन्टरनेट सेवा बिक्री गर्ने १४ वटा इन्टरनेट सेवा प्रदायक (आईएसपी) कम्पनीलाई कारबाही गरेको छ।

प्राधिकरणले ती कम्पनीलाई जनही ५० हजार रुपैयाँका दरले जरिवाना गरेको हो। स्वीकृत मापदण्डविपरीत इन्टरनेट सेवा सञ्चालन गरेको भन्दै उनीहरूमाथि कारबाही गरिएको प्राधिकरणले जनाएको छ।

कारबाहीमा परेका कम्पनीले नियामकले स्वीकृत गरेभन्दा फरक इन्टरनेट प्याकेज बिक्री गरेका थिए। सञ्चारमाध्यमका अनुसार ती कम्पनीले आफूखुसी इन्टरनेट प्याकेज बेच्दै आएका थिए।

नेपाल दूरसञ्चार प्राधिकरण दूरसञ्चार तथा इन्टरनेट सेवा प्रदायकको नियामक निकाय हो। सेवा प्रदायकले प्राधिकरणबाट स्वीकृत मापदण्ड र प्याकेजअनुसार मात्र सेवा बिक्री गर्नुपर्ने व्यवस्था छ।