भोटेकोशी बाढी: पुनर्निर्माणका लागि बागमतीले सङ्घसँग एक अर्ब रुपैयाँ माग्यो

बागमती प्रदेश सरकारले भोटेकोशी बाढीबाट क्षतिग्रस्त भौतिक संरचनाको पुनर्निर्माणका लागि सङ्घीय सरकारसँग एक अर्ब रुपैयाँ अनुदान माग्ने निर्णय गरेको छ। बिहीबार बसेको प्रदेश मन्त्रिपरिषद्को बैठकले यस्तो निर्णय गरेको हो। रसुवा जिल्ला भएर बग्ने भोटेकोशीमा गत भदौ १० गते आएको बाढीले प्रदेशभित्रका विभिन्न भौतिक पूर्वाधारमा क्षति पुर्‍याएको थियो।

प्रदेशका भौतिक पूर्वाधार विकासमन्त्री तथा सरकारका प्रवक्ता भरतबहादुर केसीले बैठकपछि निर्णय सार्वजनिक गर्नुभएको छ। मन्त्री केसीका अनुसार माग गरिएको रकम प्रदेशभित्र क्षति पुगेका पूर्वाधार फेरि बनाउन खर्च हुनेछ। भोटेकोशी विपद्को अध्ययनका लागि सङ्घीय संसद्का दुवै सदनमा विशेष समिति गठन भइसकेका छन्।

प्रतिनिधिसभाले १५ सदस्यीय र राष्ट्रिय सभाले ९ सदस्यीय समिति बनाएका छन्।