शिक्षा परीक्षाको नतिजा र प्रमाणपत्रमा मात्र सीमित हुनु हुँदैन : राष्ट्रपति पौडेल

ललितपुर। राष्ट्रपति रामचन्द्र पौडेलले प्रविधिको उच्चतम प्रयोगसँगै समयको माग अनुरूप पाठ्यक्रम र पठनपाठनलाई परिमार्जन गर्नुपर्ने बताएका छन्। उनले शनिबार ललितपुरको जावलाखेलस्थित सेन्ट जेभियर्स माध्यमिक विद्यालयमा आयोजित कार्यक्रममा यस्तो बताएका हुन्।

राष्ट्रपति पौडेलले शिक्षा परीक्षाको नतिजा र प्रमाणपत्रमा मात्र सीमित हुन नहुने बताए। उनका अनुसार शिक्षाले ज्ञान र सीपसँगै नैतिकता, अनुशासन, सिर्जनशीलता, सहकार्य, करुणा र सामाजिक उत्तरदायित्व भएका नागरिक निर्माण गर्नुपर्छ।

आधुनिक शिक्षाले सामाजिक सद्भाव, सहअस्तित्व र विविधताको सम्मान गर्ने भावना विकास गर्नुपर्ने उनको भनाइ थियो। शिक्षा व्यक्तिलाई आफ्नो समाज, संस्कृति, इतिहास र राष्ट्रप्रति सचेत तथा उत्तरदायी नागरिक बन्न सघाउने खालको हुनुपर्ने पनि उनले बताए।

समय परिवर्तनशील भएको उल्लेख गर्दै राष्ट्रपति पौडेलले परिवर्तनसँगै आधारभूत मानवीय मूल्यहरू अझ सुदृढ हुन आवश्यक रहेको बताए।