एमालेको थिंक ट्याङ्क इन्स्पायरको वेबसाइट सार्वजनिक

नेकपा एमालेका अध्यक्ष केपी शर्मा ओलीले पार्टीको थिंक ट्याङ्क नीति अध्ययन तथा अनुसन्धान प्रतिष्ठान नेपाल, अर्थात् इन्स्पायरको वेबसाइट बिहीबार सार्वजनिक गर्नुभएको छ। नेपाली र अंग्रेजी दुवै भाषामा पढ्न मिल्ने यो वेबसाइटमा अर्थ राजनीति, समाज अध्ययन, प्राकृतिक स्रोत, प्रविधि र नवप्रवर्तन तथा परराष्ट्र मामिला गरी पाँच विधा छुट्याइएका छन्। इन्स्पायरका अध्यक्ष विष्णु रिमालका अनुसार प्रतिष्ठानले देशसामु रहेका राजनीतिक, आर्थिक, सामाजिक, सांस्कृतिक, प्रविधिगत र भूराजनीतिक चुनौतीबारे अध्ययन गर्नेछ।

नीति निर्माता र विषयविज्ञलाई एउटै थलोमा जुटाएर प्रतिष्ठानले विभिन्न छलफल चलाउँदै आएको उहाँले बताउनुभएको छ। ज्ञान उत्पादन र रणनीतिक बहसमा सहजीकरण गर्दै लोकतान्त्रिक, समाजवाद उन्मुख राष्ट्रिय विकासको एजेन्डामा योगदान दिने प्रतिष्ठानको लक्ष्य छ। प्रतिष्ठानले यसअघि चलाएका नीतिगत बहसका सामग्री पनि वेबसाइटमा राखिएका छन्।