इरानलाई सहयोग रोक्न सी जिनपिङसँग ट्रम्पको आग्रह

अमेरिकी राष्ट्रपति डोनाल्ड ट्रम्पले चिनियाँ राष्ट्रपति सी जिनपिङसँग इरानलाई दिइने सबै प्रकारको सहयोग तुरुन्त बन्द गर्न आग्रह गर्नुभएको छ। राष्ट्रपति सीको वासिङ्टन भ्रमणका क्रममा यो आग्रह गरिएको हो। चीनका लागि अमेरिकी राजदूत डेभिड पर्ड्युले शुक्रबार अमेरिकी टेलिभिजन सीएनबीसीसँगको कुराकानीमा यसबारे पुष्टि गर्नुभएको छ।

अमेरिकी अधिकारीहरूका अनुसार चीनले इरानलाई आर्थिक, गुप्तचर र सैन्य सहयोग दिँदै आएको छ, जसलाई वासिङ्टनले इरानमाथिको आर्थिक दबाबमा मुख्य अवरोध मानेको छ। युद्ध सुरु भएदेखि नै चीनले हवाई रक्षा प्रणाली र ड्रोनका पार्टपुर्जा पठाएको अमेरिकी पक्षको आरोप छ। इरानले चिनियाँ व्यावसायिक भूउपग्रहका तस्बिर प्रयोग गरी मध्यपूर्वका अमेरिकी सैन्य अड्डा र फारसको खाडी तथा अरब सागरका जहाजलाई निशाना बनाएको अमेरिकी अधिकारीहरूले दाबी गरेका छन्।

त्यसपछि अमेरिकी सेनाले जहाज सञ्चालनको तरिका परिवर्तन गरेको छ। राजदूत पर्ड्युका अनुसार गुप्तचरी, पार्टपुर्जा वा सैन्य उपकरण, कुनै पनि रूपको सहयोग अस्वीकार्य हुने कुरा केही हप्ताअघि नै चीनलाई बताइएको थियो। इरानको विषयलाई ताइवानसँग जोड्न नमिल्ने कुरा पनि स्पष्ट पारिएको उहाँले बताउनुभएको छ।

उहाँका अनुसार चीनले केही कदम पछाडि फर्काएको प्रमाण अमेरिकासँग छ। चिनियाँ सरकारी सञ्चारमाध्यमका अनुसार भने राष्ट्रपति सीले जुनमा भएको समझदारी पत्रमा फर्किन र आणविक सम्झौतामार्फत इरानसँगको तनाव घटाउन ट्रम्पलाई आग्रह गर्नुभएको छ।