आँधी र अविरल वर्षाले न्युयोर्क र न्युजर्सीमा आपत्काल

अमेरिकाको उत्तरपूर्वी क्षेत्रमा शक्तिशाली आँधी र लगातारको वर्षापछि न्युयोर्क र न्युजर्सी राज्यमा आपत्कालीन अवस्था घोषणा गरिएको छ। अमेरिकी राष्ट्रिय मौसम सेवाका अनुसार शनिबार, अर्थात् १० असोजमा न्युयोर्क सहर र बोस्टनलगायतका क्षेत्रमा तेज हावाहुरीसहित भारी वर्षा भएको छ। वर्षाका कारण तटीय क्षेत्रहरू डुबानमा परेका छन्।

तीव्र हावा र भारी वर्षाले विद्युत् आपूर्ति र यातायात सेवा प्रभावित भएको छ। बेलायती सञ्चारमाध्यम बीबीसीका अनुसार दुवै राज्यका कतिपय तटीय क्षेत्रमा अझै बाढी कायम छ। न्युजर्सीको सर्फ सिटीमा सडकमा पानी भरिएपछि स्थानीय बासिन्दा पानीमै हिँडेर आवतजावत गरिरहेका दृश्य सार्वजनिक भएका छन्।

मौसम सेवाले दक्षिणको भर्जिनियादेखि उत्तरको मेन राज्यसम्म थप वर्षा र शक्तिशाली आँधी आउन सक्ने चेतावनी दिएको छ। निरन्तर वर्षा र तीव्र हावाका कारण तटीय क्षेत्रमा बाढीको खतरा अझै टरेको छैन।