कांग्रेस महाधिवेशन उद्घाटनमा ओली, प्रचण्ड र लामिछानेलाई निम्तो

नेपाली कांग्रेसले असोज १६ गते हुने आफ्नो १५औँ महाधिवेशनको उद्घाटन समारोहमा तीन प्रमुख दलका शीर्ष नेतालाई निम्तो दिएको छ। सहमहामन्त्री उदयशमशेर राणाका अनुसार प्रमुख सत्तारूढ दल राष्ट्रिय स्वतन्त्र पार्टीका सभापति रवि लामिछाने, नेकपा एमालेका अध्यक्ष केपी शर्मा ओली र नेपाली कम्युनिस्ट पार्टीका संयोजक पुष्पकमल दाहाल प्रचण्डलाई निमन्त्रणा गरिएको छ। राणाले शुक्रबार तीनै नेतालाई भेटेर निमन्त्रणापत्र हस्तान्तरण गर्नुभएको छ।

उद्घाटन समारोह काठमाडौँको खुलामञ्चमा हुनेछ। कांग्रेसले सबै राजनीतिक दलका प्रतिनिधि, पार्टीका नेता–कार्यकर्ता, शुभेच्छुक र आम नागरिकलाई पनि समारोहमा सहभागी हुन आग्रह गरेको छ। पार्टीका एक पदाधिकारीका अनुसार छिमेकी मुलुकका राजनीतिक दल तथा प्रतिनिधिलाई पनि अतिथिका रूपमा बोलाउने तयारी भइरहेको छ।

सत्तापक्ष र प्रतिपक्षका नेतृत्वलाई एउटै मञ्चमा ल्याएर दलबीच संवाद र सद्भाव बलियो बनाउने लक्ष्य राखिएको कांग्रेसले जनाएको छ। महाधिवेशन असोज १९ गतेसम्म चल्नेछ र त्यसले पार्टीको नयाँ नेतृत्व चयन गर्नेछ। यसैबीच पूर्वसभापति शेरबहादुर देउवा पक्षले यो महाधिवेशनमा सहभागी नहुने र मंसिर २१ देखि २३ गतेसम्म छुट्टै महाधिवेशन गर्ने घोषणा गरेको छ।