१३ देशका प्रस्तावित राजदूतविरुद्ध संसदीय सुनुवाइ समितिको उजुरी आह्वान

संसदीय सुनुवाइ समितिले सरकारले १३ देशका लागि सिफारिस गरेका राजदूतबारे सर्वसाधारणसँग उजुरी वा सूचना माग गरेको छ। समितिले आज जारी गरेको सार्वजनिक सूचनाअनुसार कोही नियुक्तिका लागि उपयुक्त नदेखिए स्पष्ट आधार र प्रमाण जुटाएर उजुरी दिन सकिन्छ। सूचना पहिलोपटक छापिएको दिनदेखि १० दिनभित्र सङ्घीय संसद् सचिवालय वा सम्बन्धित जिल्ला प्रशासन कार्यालयमा उजुरी दर्ता गर्न सकिनेछ।

उजुरीमा प्रस्तावित राजदूतको नाम, ठेगाना, पद र उजुरीको आधार खुलाउनुपर्नेछ। मन्त्रिपरिषद्को असोज २ गतेको बैठकले भारतका लागि डा. निश्चलनाथ पाण्डे, चीनका लागि डा.

कल्याणराज शर्मा, अमेरिकाका लागि चिरनजङ्ग थापा, बेलायतका लागि गौरबशमशेर जङ्गबहादुर राणा र जर्मनीका लागि सरू जोशीलाई सिफारिस गरेको थियो। इजरायल, स्पेन, जापान, ओमान, मलेसिया, दक्षिण कोरिया, श्रीलङ्का र साउदी अरेबियाका लागि पनि राजदूत सिफारिस भएका छन्। समितिको असोज ८ गतेको बैठकले सुनुवाइ प्रक्रिया सुरु गर्ने निर्णय गरेको थियो।

प्राप्त उजुरीको छानबिन र संसदीय सुनुवाइ सकिएपछि मात्र नियुक्ति प्रक्रिया अघि बढ्नेछ।