विदेशमा रहेका नेपालीलाई मताधिकार दिने विषयमा निर्वाचन आयोगको छलफल

निर्वाचन आयोगले विदेशमा रहेका लाखौँ नेपाली नागरिकलाई आगामी निर्वाचनमा विदेशबाटै मतदान गर्न दिने व्यवस्थाको तयारी र सरोकारवालासँगको छलफल तीव्र बनाएको छ। आयोगले यसलाई आउट अफ कन्ट्री भोटिङ अर्थात् देशबाहिरबाट मतदानको व्यवस्था भनेको छ। प्रमुख निर्वाचन आयुक्त मानबहादुर कार्कीसहितका पदाधिकारीले सम्भावित विधिबारे जानकारहरूसँग गहन विमर्श सुरु गरेका छन्।

आयोगले दूतावास र कन्सुलेटमा मतदान केन्द्र राख्ने, हुलाकबाट मत पठाउने, प्रतिनिधिमार्फत मत हाल्ने तथा विद्युतीय वा मिश्रित विधि अपनाउने विकल्प अध्ययन गरिरहेको छ। आयोगका प्रवक्ता नारायणप्रसाद भट्टराईका अनुसार विदेशमा रहेका नेपालीको यकिन सङ्ख्या कति छ, उनीहरूलाई मतदाता नामावलीमा कसरी समेट्ने र निर्वाचन सञ्चालनमा कूटनीतिक नियोगको भूमिका के हुने भन्नेबारे अहिले विचार–विमर्श भइरहेको छ। मतदान केन्द्रको व्यवस्थापन र मतदानपछि मतपत्रको सुरक्षा जस्ता प्राविधिक र प्रशासनिक पक्ष पनि आयोगको प्राथमिकतामा परेका छन्।

परराष्ट्र मन्त्रालयको सहजीकरणमा आयोगले विभिन्न देशमा रहेका नेपाली राजदूतावास तथा कूटनीतिक नियोगका प्रमुखहरूसँग पनि छलफल गरेको छ।