नेपथ्यको सांगीतिक प्रस्तुति असोज २४ मा कीर्तिपुरमा

लोकप्रिय साङ्गीतिक समूह नेपथ्यले असोज २४ गते ऐतिहासिक सहर कीर्तिपुरमा प्रत्यक्ष साङ्गीतिक प्रस्तुति दिने भएको छ। 'नेपथ्य लाइभ इन कीर्तिपुर' नामको कार्यक्रम कीर्तिपुर ल्याबोरेटरी स्कुलको मैदानमा हुने आयोजक रमाइलो इभेन्ट म्यानेजमेन्टले जनाएको छ। कार्यक्रम साँझ ६ बजे सुरु हुनेछ भने दर्शकले दिउँसो ४ बजेर १५ मिनेटदेखि नै भित्र पस्न पाउनेछन्।

प्रवेशका लागि गेट नम्बर १ र २ को व्यवस्था गरिएको छ। नेपथ्यले दर्शकमाझ लामो समयदेखि रुचाइएका आफ्ना चर्चित गीतहरू प्रत्यक्ष गाउनेछ। विभिन्न पुस्तामा लोकप्रिय नेपथ्यको सङ्गीत खुला मैदानमा प्रत्यक्ष सुन्ने अवसर मिल्ने आयोजकको भनाइ छ।

ऐतिहासिक, सांस्कृतिक र पुरातात्त्विक महत्त्वको कीर्तिपुरमा हुने प्रस्तुतिलाई आयोजकले कार्यक्रमको मुख्य आकर्षण मानेका छन्।