वीरगन्जमा भन्सार छलेर ल्याइएको माछा बोकेको ट्रक नियन्त्रणमा

पर्सा प्रहरीले भन्सार कागजातमा देखाइएभन्दा बढी माछा बोकेको एउटा मालवाहक ट्रक र त्यसका चालकलाई वीरगन्जमा नियन्त्रणमा लिएको छ। प्रहरीका अनुसार बरामद माछाको मूल्य करिब ३२ लाख ११ हजार रुपैयाँ बराबर छ। गोप्य सूचनाका आधारमा जिल्ला प्रहरी कार्यालय पर्सा, श्रीपुरस्थित वडा प्रहरी कार्यालय र सिर्सिया प्रहरी चौकीको संयुक्त टोलीले वीरगन्ज महानगरपालिका–२५ मा उक्त ट्रक रोकेको थियो।

टाटा कम्पनीको उक्त ट्रकको भन्सार प्रज्ञापनपत्रमा ९६ क्यारेट माछा मात्र देखाइएको थियो। जाँचका क्रममा ट्रकमा थप ४४ क्यारेट माछा फेला परेको प्रहरीले जनाएको छ। प्रहरी नायब उपरीक्षक चक्रबहादुर मल्लले कागजातमा लेखिएभन्दा धेरै माल भेटिएपछि ट्रक कब्जामा लिइएको बताउनुभएको छ।

चालक, ट्रक र बरामद माछा बिहीबार वीरगन्ज भन्सार कार्यालयलाई बुझाइएको छ। भन्सार कार्यालयले थप छानबिन गरी आवश्यक कारबाही अघि बढाउने प्रहरीले जनाएको छ।