चाडपर्वमा यात्रु सुरक्षा र ठगी रोक्न ट्राफिक प्रहरीको विशेष अभियान

चाडपर्वका बेला यात्रु ठगी र सडक दुर्घटना रोक्न काठमाडौँ उपत्यका ट्राफिक प्रहरी कार्यालयले विशेष अभियान चलाउने भएको छ। चाडपर्व नजिकिँदै गर्दा देशभर यात्रुको आवतजावत बढ्ने भएकाले यो तयारी थालिएको हो। उपत्यका ट्राफिक प्रहरी प्रमुख, प्रहरी वरिष्ठ उपरीक्षक सुरेशप्रसाद काफ्लेका अनुसार अभियानले अनधिकृत व्यक्तिले टिकट बेच्ने, तोकिएभन्दा बढी भाडा लिने, सिट क्षमताभन्दा बढी टिकट काट्ने र एउटै सिटको धेरै टिकट बेच्ने गतिविधि रोक्नेछ।

तीव्र गति, क्षमताभन्दा बढी यात्रु तथा सामान बोक्ने र सवारीबीचको अस्वस्थ होडबाजीले दुर्घटना निम्त्याउन सक्ने भएकाले ट्राफिक नियम कडाइका साथ लागु गरिने उहाँले बताउनुभएको छ। कार्यालयका प्रवक्ता एवं प्रहरी उपरीक्षक नरेशराज सुवेदीका अनुसार उपत्यकाभर सवारी जाँच र अनुगमन बढाइएको छ। प्रमुख स्थानहरूमा यात्रु सहायता कक्ष पनि सञ्चालन गरिने जनाइएको छ।