शरद् ऋतुमा ३१ हिमाल चढ्न ७१ देशका आरोहीलाई अनुमति

यस वर्षको शरद् ऋतुमा नेपालका हिमाल चढ्न ७१ देशका १ हजार ९८ आरोहीले अनुमति लिएका छन्। पर्यटन विभागका अनुसार यी आरोही १३० टोलीमा छन् र तीमध्ये ८३३ पुरुष तथा २६५ महिला छन्। विभागका सूचना अधिकारी सुरज घिमिरेका अनुसार ३० भन्दा बढी हिमालका लागि अनुमति दिइएको छ।

अनुमतिबापत विभागले करिब २८ करोड २४ लाख रुपैयाँ रोयल्टी उठाएको छ। सबैभन्दा धेरै आरोहीले ८ हजार १६३ मिटर अग्लो मनास्लु रोजेका छन्, जहाँ ४३ टोलीका ५०० जनाले अनुमति लिएका छन्। मनास्लु चढ्नेमा ३७३ पुरुष र १२७ महिला छन्, र उनीहरूबाट मात्रै करिब २२ करोड ५८ लाख रुपैयाँ रोयल्टी सङ्कलन भएको छ।

धौलागिरि–१ का लागि ६ टोलीका ३७ जनाले अनुमति लिएका छन्, जसबाट करिब ८४ लाख ७३ हजार रुपैयाँ रोयल्टी आएको छ। मकालु चढ्न भने १ टोलीका ३ जनाले मात्र अनुमति लिएका छन्।