रसुवाका बाढी प्रभावितलाई होल्डिङ सेन्टरबाटै नागरिकताको प्रतिलिपि वितरण सुरु

रसुवाको भोटेकोशी नदीमा आएको बाढीका कारण महत्त्वपूर्ण कागजात गुमाएका बाढी प्रभावितलाई काठमाडौँस्थित होल्डिङ सेन्टरहरूबाटै नागरिकताको प्रतिलिपि वितरण गर्ने प्रक्रिया सुरु भएको छ।

बाढीले घर र सम्पत्तिसँगै नागरिकताजस्ता महत्त्वपूर्ण कागजात पनि बगाएपछि प्रभावितहरू कागजातविहीन भएका थिए। उनीहरू हाल काठमाडौँका होल्डिङ सेन्टरमा बसिरहेका छन्।

अब प्रभावितहरूले नागरिकताको प्रतिलिपि लिन जिल्ला जानुपर्ने छैन। होल्डिङ सेन्टरमै प्रतिलिपि वितरण गर्ने व्यवस्था मिलाइएको छ।

भोटेकोशीको बाढीबाट प्रभावितहरूलाई राहत र पुनर्स्थापनाका काम पनि अघि बढिरहेका छन्।