चाडपर्व लक्षित चलचित्र: ‘टनेल २६’, ‘छ माया छपक्कै २’ र ‘कबड्डी’ प्रदर्शनमा आउँदै

आगामी चाडपर्व लक्षित गर्दै ३ नेपाली चलचित्रले प्रदर्शन मिति सार्वजनिक गरेका छन्। नेपाल, भुटान र भारतको सहकार्यमा बनेको जम्बी हरर चलचित्र ‘टनेल २६ : द कर्स बिनिथ द माउन्टेन’ असोज २३ गतेदेखि नेपाल र भुटानका हलमा प्रदर्शन हुनेछ। निर्माण टोलीले शनिबार आधिकारिक पोस्टर सार्वजनिक गर्दै प्रदर्शन मिति घोषणा गरेको हो।

यसको ट्रेलर आउँदो मंगलबार काठमाडौंमा विशेष कार्यक्रम गरी सार्वजनिक गरिनेछ, जसमा भुटानबाट कलाकार तथा निर्माण टोली सहभागी हुनेछन्। संगय छेल्ट्रिम फिल्म्स र पिक एक्सभी स्टुडियोजको ब्यानरमा बनेको यस चलचित्रमा निर्वाण चौधरी, अभिनेता प्रदीप खड्का, भारतीय फिल्ममेकर प्रशान्त कुमार गुप्ता तथा भुटानी अभिनेता–निर्माता संगय छेल्ट्रिम र दोर्जी वाङ्चुकको सहकार्य रहेको छ। त्यस्तै दीपकराज गिरी र दीपाश्री निरौलाको ‘छ माया छपक्कै २’ असोज ३१ गते फूलपातीको दिनदेखि प्रदर्शनमा आउने भएको छ।

दीपेन्द्र लामाको निर्देशन रहेको यस चलचित्रमा दीपकराज गिरी, केकी अधिकारी र सनिशा भट्टराई मुख्य भूमिकामा छन्। सफल फ्रेन्चाइज ‘कबड्डी’ को पाँचौं शृंखला ‘कबड्डी ५ : आफ्टर द फाइनल म्याच’ भने दसैंको टीकाको पर्सिपल्ट कात्तिक ६ गतेदेखि हलमा पुग्नेछ। पोस्टरमा दयाहाङ राई, विजय बराल र बुद्धि तामाङलाई उनीहरूकै परिचित चरित्रमा प्रस्तुत गरिएको छ।

निर्देशक रामबाबु गुरुङका अनुसार पात्रहरूको कथा अधुरो रहेकाले पाँचौं शृंखला बनाइएको हो। यसअघिका ४ वटै शृंखला बक्स अफिसमा सफल भएका छन् र ‘कबड्डी ४’ ले करिब २२ करोड रुपैयाँ ग्रस कलेक्सन गरेको थियो।