चाडपर्व लक्षित विशेष सुरक्षा योजना: कोशीमा ८ हजारभन्दा बढी प्रहरी, सप्तरीमा पनि योजना

आसन्न दसैँ, तिहार र छठलाई लक्षित गर्दै कोशी प्रदेश प्रहरीले प्रदेशभर ८ हजारभन्दा बढी सुरक्षाकर्मी खटाएर विशेष सुरक्षा कार्ययोजना लागू गरेको छ। चाडपर्वमा हुन सक्ने चोरी, लुटपाट, ठगी र सवारी दुर्घटना रोक्न प्रदेशका सबै १४ जिल्लामा सुरक्षा कडा पारिएको छ। प्रदेश प्रहरी प्रमुख डीआईजी शेखर खनालका अनुसार बजार क्षेत्र, राजमार्ग, सार्वजनिक यातायात, धार्मिक स्थल, सीमानाका र आर्थिक कारोबार हुने केन्द्रलाई उच्च प्राथमिकतामा राखेर तैनाथी बढाइएको छ।

प्रदेशमा ड्रोन र प्रहरी कुकुरको सहायताले पनि निगरानी गरिने भएको छ। यता मधेश प्रदेशको सप्तरीमा जिल्ला प्रहरी कार्यालयले शुक्रबार पत्रकार सम्मेलन गरी चाडपर्वका लागि विशेष सुरक्षा योजना सार्वजनिक गरेको छ। प्रहरी उपरीक्षक रुपक खडकाका अनुसार जिल्लाभर वर्दी र सादा पोशाकका प्रहरी तथा ट्राफिक प्रहरी गरी करिब ९ सय प्रहरी खटिनेछन्।

योजनाअन्तर्गत पिकेट, पैदल गस्ती, मोबाइल टोली, बजार अनुगमन, यात्रु सहायता कक्ष र रिफ्रेस प्वाइन्टको व्यवस्था मिलाइएको छ। छिन्नमस्ता भगवती र कंकालिनी मन्दिर, बैंक तथा वित्तीय संस्था, सुनचाँदी पसल र पार्किङ स्थलमा थप प्रहरी परिचालन हुनेछ। आवश्यक परे मधेश प्रदेश प्रहरीबाट थप जनशक्ति माग गरिने खडकाले बताउनुभएको छ।