बुटवलमा मदन भण्डारी कप अन्तर्राष्ट्रिय पुरुष भलिबल सुरु

पूर्वराष्ट्रपति विद्यादेवी भण्डारीले आज दिउँसो ३ बजे बुटवलमा मदन भण्डारी कप अन्तर्राष्ट्रिय आमन्त्रित रनिङ शिल्ड पुरुष भलिबल प्रतियोगिताको उद्घाटन गर्ने कार्यक्रम छ। मदन भण्डारी स्पोर्ट्स एकेडेमीले आयोजना गरेको प्रतियोगिताको यो दोस्रो संस्करण असोज १७ गतेसम्म चल्नेछ। प्रतियोगितामा नेपालका पाँच र विदेशका तीन गरी आठ टोली सहभागी छन्।

नेपालबाट नेपाल पुलिस क्लब, एपीएफ क्लब, मणिमुकुन्द भलिबल क्लब, सभापोखरी भलिबल क्लब र गल्कोट भलिबल क्लबले प्रतिस्पर्धा गर्नेछन्। विदेशी टोलीमा भारतको गुजरात राज्यको टोली पनि छ। एकेडेमीका अध्यक्ष ध्रुव आचार्यका अनुसार प्रतियोगितामा स्वदेशी र विदेशी खेलाडीको उच्च स्तरको खेल हेर्न पाइनेछ।

ट्रफी सार्वजनिक गर्दै बुटवल उपमहानगरपालिकाकी उपप्रमुख सावित्रा अर्यालले प्रतियोगिताले बुटवललाई खेलकुद पर्यटनको गन्तव्यका रूपमा चिनाउन मद्दत गर्ने बताउनुभएको छ।