वर्षा प्रणाली पश्चिमतर्फ, ३८ जिल्लामा बाढीको उच्च जोखिम; पाल्पाको अर्चलेमा सर्वाधिक वर्षा

बंगालको खाडीमा बनेको न्यून चापीय प्रणालीको प्रभाव पश्चिमतर्फ सर्दै गएकाले आज राति र भोलि पश्चिमी भूभागमा वर्षा बढ्ने पूर्वानुमान गरिएको छ। जल तथा मौसम विज्ञान विभागका अनुसार यो प्रणाली अहिले भारतको उत्तर महाराष्ट्र र छत्तीसगढ आसपास छ र आगामी २४ घण्टामा कमजोर हुँदै जानेछ। मौसमविद् रोजन लामिछानेका अनुसार पूर्वी भागमा शनिबारदेखि वर्षा घट्नेछ र असोज १२ गते सोमबारदेखि मौसममा क्रमिक सुधार आउने अनुमान छ।

विभागले आज लुम्बिनी र गण्डकीका एक–दुई स्थानमा तथा भोलि लुम्बिनी र सुदूरपश्चिमका एक–दुई स्थानमा अति भारी वर्षाको सम्भावना औँल्याएको छ। मौसम पूर्वानुमान महाशाखाको जोखिम नक्सामा बागमती र पूर्वका केही जिल्ला पहेँलो तथा गण्डकीभन्दा पश्चिमका उच्च पहाडी र हिमाली जिल्ला रातो संकेतमा राखिएका छन्। बाढी पूर्वानुमान महाशाखाले आज र भोलि गरी करिब ३८ जिल्लाका साना नदीमा आकस्मिक बाढीको उच्च जोखिम रहेको जनाएको छ।

आज गोरखा, लमजुङ, कास्की, मनाङ, मुस्ताङ, दाङ, बाँके, बर्दिया, सुर्खेत, दैलेख, कैलाली र कञ्चनपुरमा उच्च जोखिम छ। मौसम पूर्वानुमान महाशाखाका अनुसार शुक्रबार दिउँसोसम्मको २४ घण्टामा सबैभन्दा बढी करिब २०५ मिलिमिटर वर्षा पाल्पाको अर्चलेमा मापन भएको छ। विभागका अनुसार आज पोखरामा वर्षाको सम्भावना १०० प्रतिशत र तापक्रम २३ देखि २५ डिग्री सेल्सियस छ।

नेपालगञ्जमा मेघगर्जनसहित भारी वर्षाको सम्भावना ८० प्रतिशत छ।