कोशी ब्यारेजका ३१ ढोका खुला; तिनाउ, त्रिशूली र रोशी सतर्कता तहमाथि

सप्तकोशीको बहाव बढेपछि कोशी ब्यारेजमा रातो सतर्कता जारी गरिएको छ र करिब ३१ ढोका खोलिएका छन्। सुनसरीका प्रमुख जिल्ला अधिकारी ईश्वरीप्रसाद अर्यालका अनुसार ब्यारेजमा करिब २ लाख ४० हजार क्युसेक बहाव मापन भएको छ। विगतका वर्षहरूमा यहाँ करिब ५ लाख क्युसेकसम्म बाढी मापन भएकाले आत्तिनुपर्ने अवस्था नभए पनि प्रशासन सतर्क रहेको उहाँले बताउनुभएको छ।

कोशी पुलमा सवारी आवागमन रोकिएको छैन र बहाव थप बढे आवश्यक निर्णय गरिने उहाँको भनाइ छ। कोशी परियोजनाका अनुसार बहाव बढेसँगै भारतको बिहार क्षेत्र पनि जोखिममा परेको छ। जल तथा मौसम विज्ञान विभागले सप्तकोशीको तल्लो तटीय र डुबान हुने क्षेत्रका बासिन्दालाई पर्सिसम्म उच्च सतर्कता अपनाउन अनुरोध गरेको छ।

बाढी पूर्वानुमान महाशाखाका अनुसार रुपन्देहीको तिनाउ नदीले बुटवल जलमापन केन्द्रमा सतर्कता तह पार गरेको छ र बहाव बढ्दो छ। तिनाउ किनारका बासिन्दालाई आइतबार बिहानसम्म सतर्क रहन भनिएको छ। नुवाकोटको त्रिशूली नदीले धुन्चे जलमापन केन्द्रमा र काभ्रेको रोशी खोलाले पनौतीमा सतर्कता तह नाघेका छन्।

भक्तपुरको जगातीमा हनुमन्ते खोलाको जलसतह पनि सतर्कता तहमा पुगेको छ। महाशाखाकी जलविद् सरस्वती बिष्टले आगामी एक–दुई दिन नदीमा अचानक जलसतह बढ्न सक्ने भएकाले विशेष सावधानी अपनाउन आग्रह गर्नुभएको छ।