उपत्यकाका नदी सतर्कता तहमाथि, च्यासल पुल बन्द, करिडोरमा यात्रा नगर्न आग्रह

काठमाडौँ उपत्यकाका बागमती, विष्णुमती, हनुमन्ते, मनोहरा र बल्खु खोलाको जलसतह सतर्कता तह नाघेपछि प्रशासनले नदी करिडोरमा यात्रा नगर्न आग्रह गरेको छ। ललितपुरको च्यासलस्थित पुलसम्म बाढी पुगेपछि त्यहाँबाट आवतजावत रोकिएको छ। उपत्यका ट्राफिक प्रहरी कार्यालयका प्रवक्ता नरेशराज सुवेदीका अनुसार तटीय क्षेत्रमा निगरानी बढाइएको छ र नदी किनारमा राखिएका सवारीसाधन हटाउन माइकिङ गरिएको छ।

थापाथलीमा बागमतीको जलसतह सतर्कता तहभन्दा माथि पुगेको छ भने बल्खु तरकारी बजार क्षेत्रमा बाढीको पानी पसेको छ। बल्खु खोलाको कटानले जोखिममा परेको एउटा घरबाट करिब ६ परिवारलाई अन्यत्र सारिएको काठमाडौँ प्रहरीका प्रवक्ता दानबहादुर थापाले बताउनुभएको छ। हनुमन्ते उर्लिएपछि मध्यपुर थिमी–१ लोकन्थलीको सिर्जना टोलबाट करिब १६ परिवारलाई सुरक्षित स्थानमा पुर्‍याइएको जिल्ला प्रहरी भक्तपुरले जनाएको छ।

गृहमन्त्री सुधन गुरुङले मनोहराको बहाव बढेपछि च्यासलस्थित नेकपा एमालेको केन्द्रीय कार्यालय आसपास पुगेर अवस्था अवलोकन गर्नुभएको छ। उपत्यकाको पानी निस्कने चोभार गल्छीमा पनि बहाव बढेको छ र त्यहाँ बाढी हेर्न आउनेको भीड लागेको छ। सशस्त्र प्रहरी बलले आपत्कालीन अवस्थामा टोल फ्री नम्बर १११४ वा आपत्कालीन कार्यसञ्चालन केन्द्रको १२३४ मा सम्पर्क गर्न अनुरोध गरेको छ।

जल तथा मौसम विज्ञान विभागका अनुसार आज काठमाडौँमा वर्षाको सम्भावना ९० प्रतिशत छ।