काठमाडौँ जोड्ने प्रमुख राजमार्ग अवरुद्ध, त्रिभुवन राजपथ मात्र खुला

अविरल वर्षापछि ठाउँठाउँमा पहिरो खसेर काठमाडौँ जोड्ने पृथ्वी राजमार्ग, बीपी राजमार्ग र कान्तिलोकपथ अवरुद्ध भएका छन्। अत्यावश्यक खाद्यान्न र इन्धन भित्र्याउन त्रिभुवन राजपथ मकवानपुरबाट काठमाडौँ आउने दिशामा मात्र एकतर्फी खुला राखिएको उपत्यका ट्राफिक प्रहरीका प्रवक्ता नरेशराज सुवेदीले बताउनुभएको छ। जिल्ला प्रहरी कार्यालय धादिङका अनुसार पृथ्वी राजमार्गमा करिब सात स्थानमा पहिरो खसेको छ, जसमध्ये कृष्णभीर र तिगराङ खोलामा सडक पूर्ण रूपमा बन्द छ।

कृष्णभीरमा नयाँ ट्र्याकको नदीतर्फको ग्याबिन संरचना केही तल झरेको छ। साना सवारीका लागि कुलेखानी–फर्पिङ, टोखा–छहरे र साँखु हुँदै जाने वैकल्पिक सडक खुला रहेको प्रहरीले जनाएको छ। पहिरो पन्छाएपछि नारायणगढ–मुग्लिन खण्डमा पोखरातर्फ जाने सवारी मात्र चलाउन थालिएको सडक डिभिजन कार्यालय भरतपुरले जनाएको छ, तर काठमाडौँतर्फको आवागमन अझै बन्द छ।

काठमाडौँबाट बाहिरिने मालवाहक ट्रक कलंकी, बल्खु र नागढुङ्गामा रोकिएका छन्। गृह मन्त्रालयको विपद् प्रतिकार्य शाखाका अनुसार देशभर करिब १४ राजमार्ग तथा सडकखण्ड अवरुद्ध छन्, जसमध्ये करिब १० बागमती प्रदेशमा छन्। मकवानपुर प्रशासनले त्रिभुवन राजपथमा इन्धन र ग्यासबाहेक करिब १५ टनभन्दा भारी मालवाहक चलाउन रोक लगाएको छ।

बीपी राजमार्गको चौकीडाँडामा रोशी खोलाले अस्थायी डाइभर्सन बगाएकाले वर्षा रोकिएलगत्तै पुरानै ट्र्याकबाट सवारी चलाइने डिभिजन सडक कार्यालय भक्तपुरले जनाएको छ।