बिजुलीको भ्याट हटाउने सहमति नभएको अर्थमन्त्रीको सचिवालयको भनाइ

अर्थमन्त्री डा. स्वर्णिम वाग्लेको सचिवालयले बिजुली महसुलमा लगाइएको भ्याट हटाउने विषयमा कुनै सहमति नभएको जनाएको छ। सचिवालयले मंगलबार विज्ञप्ति निकाल्दै यस विषयमा अर्थमन्त्रीले सोमबार साँझ वा अघिल्लो साता ऊर्जामन्त्री विराजभक्त श्रेष्ठसँग कुनै भेटवार्ता र छलफल नगरेको स्पष्ट पारेको छ।

चालु आर्थिक वर्षको बजेटमार्फत बिजुलीमा लगाइएको भ्याट दुई महिनामै हटाउने तयारी भएको समाचार सोमबार मध्याह्न सञ्चारमाध्यममा आएपछि सचिवालयले यस्तो खण्डन गरेको हो। ती समाचारमा आइतबार दुवै मन्त्रीबीच भएको छलफलमा भ्याट फिर्ता लिन सैद्धान्तिक सहमति जुटेको उल्लेख थियो। अर्थमन्त्रीका स्वकीय उपसचिव नवीन ढुंगानाले त्यस्तो कुनै कुराकानी वा सहमति नभएको बताउनुभएको छ।

उहाँले अघिल्लो दिन दिउँसोदेखि रातिसम्म आफू मन्त्रीसँगै रहेको र दुवै मन्त्रीबीच यसबारे कुरा भएको जानकारी नपाएको बताउनुभएको छ। अर्थसचिव डा. घनश्याम उपाध्यायले पनि यस विषयमा आफूसम्म कुनै जानकारी नआएको बताउनुभएको छ।

सचिवालयका अनुसार अर्थमन्त्रीले प्रतिनिधि सभा र राष्ट्रिय सभाका बैठकमा राखेको धारणाअनुसार थप सहजीकरण र उपभोक्तालाई राहत दिने विषयमा मातहतका निकायले छलफल र अध्ययन गरिरहेका छन्।