भदौमा करिब पाँच अर्ब रुपैयाँको बिजुली निर्यात

नेपाल विद्युत् प्राधिकरणका अनुसार नेपालले गत भदौ महिनामा छिमेकी भारत र बङ्गलादेशमा बिजुली बेचेर करिब ५ अर्ब ९ करोड २४ लाख रुपैयाँ आम्दानी गरेको छ। सो अवधिमा दुवै मुलुकतर्फ करिब ५६ करोड ५६ लाख युनिट बिजुली निर्यात भएको प्राधिकरणले जनाएको छ। प्राधिकरणले द्विपक्षीय सम्झौता र विद्युत् बजार, अर्थात् एक्सचेन्ज मार्केट गरी दुई माध्यमबाट बिजुली बेच्दै आएको छ।

द्विपक्षीय सम्झौताअनुसार नेपालले भारतको हरियाणा र बिहार राज्य तथा बङ्गलादेशमा बिजुली पठाउँदै आएको छ। यो माध्यमबाट भदौमा करिब ४२ करोड १६ लाख युनिट बिक्री भई करिब ३ अर्ब ६४ करोड २५ लाख रुपैयाँ आर्जन भएको छ। एक्सचेन्ज मार्केटमार्फत भने सोही अवधिमा करिब १४ करोड ३९ लाख युनिट बेचेर करिब १ अर्ब ४४ करोड ९९ लाख रुपैयाँ प्राप्त भएको छ।

भोटेकोशी नदीमा आएको बाढीबाट चिलिमे र त्रिशूली जलविद्युत् केन्द्रका संरचनासँगै त्रिशूली–३ 'बी' हब सबस्टेसनमा समेत क्षति पुगेको छ। यो क्षतिपछि बङ्गलादेशतर्फको बिजुली निर्यात हाल रोकिएको प्राधिकरणले जनाएको छ।