इयूसँग नयाँ गठबन्धनको क्यानडाली प्रस्ताव

क्यानडाका प्रधानमन्त्री मार्क कार्नीले युरोपेली संघसँग ‘नयाँ गठबन्धन’ निर्माण गर्ने प्रस्ताव अघि सारेका छन्। फ्रान्सको स्ट्रासबर्गस्थित युरोपेली संसद्मा बिहीबार सम्बोधन गर्दै उहाँले बाह्य दबाबको सामना गर्न दुवै पक्षबीचको सहकार्य विस्तार गर्नुपर्नेमा जोड दिनुभएको छ। रक्षा, ऊर्जा, कृत्रिम बुद्धिमत्ता, महत्त्वपूर्ण खनिज, अन्तरिक्ष र भुक्तानी प्रणालीजस्ता रणनीतिक क्षेत्रमा सहकार्य गहिरो बनाउन क्यानडा इच्छुक रहेको उहाँले बताउनुभएको छ।

युरोपेली आयोगकी अध्यक्ष उर्सुला भोन डेर लायनले बुधबार वार्षिक ‘स्टेट अफ द युरोपियन युनियन’ सम्बोधनमा क्यानडा २७ सदस्यीय युरोपेली संघको पहिलो ‘एसोसिएट सदस्य’ बन्न सक्ने प्रस्ताव गरेकी थिइन्। कार्नीले सो प्रस्तावको स्वागत गर्दै ‘युरोप र क्यानडा सँगै बलिया छन्’ भन्नुभएको छ। यस्तो गठबन्धन लोकतन्त्रका लागि आधारस्तम्भ बन्ने उद्देश्यले प्रेरित रहेको र अरूमाथि प्रभुत्व जमाउन नभएको उहाँको भनाइ छ।

अमेरिकी राष्ट्रपति डोनाल्ड ट्रम्पले भने क्यानडाले युरोपेली संघसँगको सम्बन्ध थप बलियो बनाएमा युरोपमाथि कडा शुल्क लगाउने वा व्यापार रोक्ने चेतावनी दिएका छन्।