शुक्लाफाँटामा बस्ती पस्ने जंगली हात्तीलाई रेडियो कलर लगाइने

कञ्चनपुरको शुक्लाफाँटा राष्ट्रिय निकुञ्ज वरपरका बस्तीमा पसिरहने जंगली हात्तीको निगरानी गर्न तिनलाई रेडियो कलर लगाइने भएको छ। राष्ट्रिय निकुञ्ज तथा वन्यजन्तु संरक्षण विभागले मानव–वन्यजन्तु द्वन्द्व घटाउने उद्देश्यले शुक्लाफाँटा राष्ट्रिय निकुञ्ज कार्यालयलाई यो काम अघि बढाउन निर्देशन दिएको छ। निकुञ्जको मध्यवर्ती क्षेत्रमा वर्षौंदेखि हात्ती बस्तीमा पसेर बालीनाली र सम्पत्ति नष्ट गर्दै आएका छन्, जसले मानिसको सुरक्षामा पनि खतरा बढाएको छ।

कलरबाट हात्तीको आवतजावतबारे सूचना सङ्कलन गरिनेछ। त्यस तथ्याङ्कको नियमित अनुगमन र विश्लेषण गरी हात्ती बस्तीतर्फ आउन सक्ने जोखिम पहिल्यै आकलन गर्ने विभागको लक्ष्य छ। कृषि, वन तथा वातावरणमन्त्री गीता चौधरीले यस्तो पूर्वानुमानले स्थानीय समुदायलाई समयमै सचेत गराउन सकिने बताउनुभएको छ।

उहाँका अनुसार यसबाट जनधनको क्षति घटाउन सहयोग पुग्नेछ।