ह्वेन साङको यात्रा वृत्तान्तको नेपाली संस्करण सार्वजनिक

चिनियाँ बौद्ध भिक्षु ह्वेन साङले लेखेको यात्रा वृत्तान्त ‘महान् ताङको पश्चिमी क्षेत्रको अभिलेख’ अब नेपाली भाषामा पनि उपलब्ध भएको छ। राष्ट्रिय सभाका अध्यक्ष नारायणप्रसाद दाहालले शुक्रबार काठमाडौँको कमलादीस्थित नेपाल प्रज्ञा प्रतिष्ठानमा आयोजित समारोहमा पुस्तकको विमोचन गर्नुभएको छ। करिब १४ सय वर्षअघि नेपाल र भारतको यात्राका क्रममा ह्वेन साङले टिपेका विवरण यस ग्रन्थमा समेटिएका छन्।

यो ग्रन्थ पूर्ण रूपमा नेपालीमा अनूदित भएको यो पहिलोपटक हो। पुस्तकको चिनियाँ अनुवाद फ छियाङले र नेपाली अनुवाद दीक्षा ढकालले गर्नुभएको हो। समारोहमा अध्यक्ष दाहालले नेपाल–चीन सम्बन्ध हजारौँ वर्षदेखिको सांस्कृतिक, सामाजिक र व्यापारिक आदानप्रदानमा आधारित रहेको बताउनुभएको छ।

उहाँका अनुसार सन् १९५५ मा दुवै देशबीच औपचारिक कूटनीतिक सम्बन्ध कायम भएको थियो र नेपाल ‘एक चीन’ नीतिमा प्रतिबद्ध छ। उहाँले ह्वेन साङको पैदल यात्रालाई आजको सडक सञ्जालमार्फत विश्व जोड्ने प्रयाससँग तुलना गर्नुभएको छ। चीनले अघि सारेको बेल्ट एन्ड रोड इनिसिएटिभ अर्थात् बीआरआईले ग्लोबल साउथका देशलाई आपसमा जोड्ने लक्ष्य राखेको उहाँको भनाइ छ।

पुस्तकले नेपाली पाठकलाई ताङ वंशको इतिहास, बौद्ध धर्म र नेपाल–चीन सम्बन्ध बुझ्न सघाउने उहाँले विश्वास व्यक्त गर्नुभएको छ। नेकपा एमालेका उपाध्यक्ष रघुजी पन्तले नेपाली र चिनियाँ जनता बुद्धका शान्ति र सहअस्तित्वको सन्देशबाट प्रभावित रहेको बताउनुभएको छ।