म्याग्दीमा पहिरोले १९ घरमा क्षति, बेनीसँग सम्पर्क टुट्यो

म्याग्दीमा तीन दिनदेखि लगातार परेको वर्षापछि गएको पहिरोले १९ घरमा क्षति पुर्‍याएको छ। जिल्ला प्रशासन कार्यालय म्याग्दीका सहायक प्रमुख जिल्ला अधिकारी कुलप्रसाद आचार्यका अनुसार असोज १० गते साँझसम्म पाँच वटा गोठ पनि भत्किएका छन् र २८ घरपरिवारलाई सुरक्षित स्थानमा सारिएको छ। बाढी र पहिरोका कारण ग्रामीण बस्तीहरूको सदरमुकाम बेनी बजारसँग सम्पर्क टुटेको छ।

गाउँतिर बिजुली आपूर्ति पनि प्रभावित भएको छ। म्याग्दी, राहुघाट र कालीगण्डकी नदीमा बाढीको सतह बढेकाले सतर्कता अपनाइएको छ। मङ्गला गाउँपालिका–२ रनवाङका १३ जनालाई स्थानान्तरण गरिएको छ र त्यहाँ दुई घरमा क्षति पुगेको छ।

मङ्गला–५ घेगरेका छ घरपरिवारलाई आमा समूहको भवनमा राखिएको छ। अन्नपूर्ण गाउँपालिका–५ किन्दुमा दुई घर भत्किएका छन् र दुई घरपरिवारलाई सुरक्षित ठाउँमा सारिएको छ। पहिरो, कटान र बाढीका कारण बेनी–जोमसोम, बेनी–दरबाङ र बेनी–पाखापानी सडक अवरुद्ध भएका छन्।

जल तथा मौसम विज्ञान विभागका अनुसार असोज ११ गते गण्डकी प्रदेशका हिमाली र पहाडी भूभागका एक–दुई स्थानमा भारी वर्षाको सम्भावना छ।