सातामा दुई दिन बिदा माग्दै भारतमा तीन दिने बैंक हड्ताल

भारतमा सातामा दुई दिन बिदा हुनुपर्ने माग राख्दै बैंक कर्मचारीहरू सेप्टेम्बर २८ देखि ३० सम्म तीन दिन हड्ताल गर्ने भएका छन्। युनाइटेड फोरम अफ बैंक युनियन्सले यो हड्तालको आह्वान गरेको छ। सेप्टेम्बर २६ मा चौथो शनिबार र २७ मा आइतबार परेकाले हड्तालसँग जोडिँदा बैंकिङ सेवा लगातार पाँच दिन अवरुद्ध हुने देखिएको छ।

यस अवधिमा करिब १५ हजारदेखि २० हजार करोड भारतीय रुपैयाँबराबरका चेक भुक्तानी प्रभावित हुन सक्ने अनुमान गरिएको छ। नेपाल राष्ट्र बैंकले शुक्रबारका लागि तोकेको दरअनुसार भारतीय १०० रुपैयाँको खरिद दर १६० रुपैयाँ र बिक्री दर १६० रुपैयाँ १५ पैसा छ। यसअनुसार प्रभावित हुन सक्ने रकम नेपाली मुद्रामा करिब २४ हजारदेखि ३२ हजार करोड रुपैयाँबराबर हुन्छ।

हड्तालमा लाखौँ बैंक कर्मचारी सहभागी हुने बताइएको छ। तर निजी क्षेत्रका केही ठूला बैंकले भने हड्तालमा भाग नलिने जनाएका छन्। अत्यावश्यक सेवा नरोकियोस् भनेर भारत सरकारले आइतबार पनि सरकारी बैंकका शाखा खुला राख्ने तयारी गरेको छ।