विकट सेखुवामा गाउँमै सामुदायिक स्वास्थ्य सेवा इकाइ सुरु

खोटाङको साकेला गाउँपालिका–१ सेखुवामा सोमबारदेखि सामुदायिक स्वास्थ्य सेवा इकाइ सञ्चालनमा आएको छ। गाउँपालिका अध्यक्ष रविप्रकाश राईले भवन उद्घाटन गर्दै सेवा सुरु गराउनुभएको यो इकाइ गाउँपालिकाभित्रको आठौँ स्वास्थ्य संस्था हो। गाउँपालिकाकै सबैभन्दा विकट मानिने सेखुवाका बासिन्दा यसअघि सामान्य उपचार गराउन पनि मानेभञ्ज्याङस्थित गाउँपालिका केन्द्र वा छिमेकी पालिकाका स्वास्थ्य संस्था धाउनुपर्थ्यो।

अब सेखुवा, साबिक वडा नम्बर १ र २ तथा आसपासका नागरिकले प्राथमिक उपचार र स्वास्थ्य परामर्शजस्ता आधारभूत सेवा गाउँमै पाउने भएका छन्। इकाइको भवन गाउँपालिकाकै लगानीमा निर्माण गरिएको छ। अध्यक्ष राईले ठाउँ विकट भएकै कारण कसैले पनि आधारभूत स्वास्थ्य सेवा गुमाउनु नपर्ने बताउनुभएको छ।

उहाँका अनुसार राज्यले सबैभन्दा बढी आवश्यकता भएको ठाउँमा सेवा पुर्‍याउनुपर्छ र यो इकाइ नागरिकको स्वास्थ्य अधिकार व्यवहारमा लागू गर्ने कदम हो। उहाँले गाउँको विकास स्थानीय सरकारको प्रयासले मात्र सम्भव नहुने भन्दै नागरिकले श्रम, जग्गा, ज्ञान र सीपमार्फत योगदान गर्नुपर्नेमा जोड दिनुभएको छ। २५ लाख रुपैयाँभन्दा बढी मूल्य पर्ने जग्गा इकाइको भवनका लागि निःशुल्क दिने स्थानीय अदमबहादुर राईको योगदानको कदर गर्दै कार्यक्रममा उहाँका छोरा दिलकुमार राईलाई दोसल्ला ओढाएर सम्मान गरिएको छ।