तेह्रथुमको डाँडाखर्कमा सानो लगानीबाट सुरु खेती ८० लाखको व्यवसाय

तेह्रथुमको म्याङलुङ नगरपालिका–४ डाँडाखर्ककी तुलसा खनाल बुढाथोकीले करिब १ लाख ५० हजारदेखि २ लाख रुपैयाँबाट सुरु गरेको तरकारी खेतीमा लगानी अहिले करिब ८० लाख रुपैयाँ पुगेको छ। कामदारको ज्याला, मल र बीउको खर्च कटाएर पनि उहाँलाई वर्षमा १५ लाख रुपैयाँसम्म आम्दानी हुने गरेको छ। झन्डै १६ वर्षअघि १२ देखि १५ टनेलबाट व्यावसायिक खेती थाल्नुभएकी उहाँले अहिले करिब २० रोपनीमा ५० वटा टनेल बनाउनुभएको छ।

टनेलमा टमाटर, भन्टा, अकबरे खुर्सानी, काक्रो र बोडीलगायत तरकारी उत्पादन भइरहेको छ। सृजनशील कृषि फर्म दर्ता गरेर खेती गरिरहनुभएकी बुढाथोकीले २०७६ सालमा प्रदेश सरकारबाट करिब ५ लाख रुपैयाँ अनुदान पाएपछि टनेलको सङ्ख्या बढाउनुभएको हो। उहाँका अनुसार हप्तामा २ पटक हाटबजार पुर्‍याइने तरकारी प्रत्येक पटक करिब १० हजारदेखि ४० हजार रुपैयाँसम्ममा बिक्री हुने गरेको छ।

खेतीमा गाउँकै २ जना महिला मासिक करिब १८ हजार रुपैयाँ पारिश्रमिकमा स्थायी रूपमा काम गरिरहेका छन् भने थप श्रमिकलाई दैनिक ५०० देखि १ हजार ५०० रुपैयाँसम्म दिने गरिएको छ। परिवारले करिब ८० रोपनीमा धानखेती पनि गर्दै आएको छ, जसको जिम्मा सरकारी सेवाबाट अवकाशप्राप्त ससुराले लिनुभएको छ। बुढाथोकीले सीपसहित मेहनत गरे सरकारी जागिरभन्दा तरकारी खेती फाइदाजनक हुने बताउनुभएको छ।