बाढीपछि प्रमुख सडक खुल्दै: पृथ्वी राजमार्ग दुईतर्फी, पोखरा–बेनी र कालीगण्डकी करिडोर सञ्चालनमा, गल्छी–बेत्रावती आजदेखि

बाढी र पहिरोले अवरुद्ध पृथ्वी राजमार्गसहित देशका प्रमुख सडक फेरि सञ्चालनमा आएका छन्। धादिङको गजुरी गाउँपालिका–२ छहरेमा खसेको पहिरो र ठूला ढुङ्गा हटाएपछि पृथ्वी राजमार्गमा दुईतर्फी यातायात सुरु भएको नागढुङ्गा–नौबिसे–मुग्लिङ सडक आयोजनाले जनाएको छ। सडक खुले पनि परेवाभीरलगायतका स्थानमा जोखिम भने कायमै छ।

पाँच दिनदेखि बन्द पोखरा–बेनी सडक बुधबार साँझदेखि खुलेको छ। म्याग्दीका प्रहरी नायब उपरीक्षक राजन कार्कीका अनुसार मालढुङ्गा–बेनी खण्डमा भने एकतर्फी रूपमा मात्र सवारी चलिरहेका छन्। गुल्मीको हर्मिचौर–अर्वेनी–पुर्तिघाट खण्डमा पहिरो पन्छाएपछि कालीगण्डकी करिडोर पनि बुधबार बेलुकादेखि सञ्चालनमा आएको जिल्ला प्रहरी कार्यालयले जनाएको छ।

एक महिनाअघिको बाढीले क्षतिग्रस्त गल्छी–बेत्रावती सडकमा बिहीबारदेखि अस्थायी रूपमा सवारी चल्ने भएको छ। सडक डिभिजन कार्यालय नुवाकोटका प्रमुख बद्रीप्रसाद शर्माका अनुसार बेत्रावतीको पुल बगेकाले बेलीब्रिज नजोडिएसम्म स्याफ्रुबेसीसम्म पुग्न सकिँदैन। बेत्रावतीदेखि स्याफ्रुबेसीसम्मको सडकमा भने समस्या छैन।

बेलीब्रिजको जग तयार भइसकेको छ र सडक खुलेपछि नेपाली सेनाले पुल जोड्ने काम अघि बढाउनेछ।