बेइजिङवरिपरि विशाल हवाई सुरक्षा क्षेत्र बनाउँदै चीन

चीनले राजधानी बेइजिङवरिपरि इटलीको क्षेत्रफलजत्रो विशाल स्थायी हवाई प्रतिबन्धित क्षेत्र तोकेको छ। रोयटर्सले समीक्षा गरेको उड्डयन सूचना अनुसार बेइजिङलाई केन्द्र मानेर करिब ६०० किलोमिटर चौडा घेरामा फैलिएको यो क्षेत्र सेप्टेम्बर २० देखि लागू हुनेछ। अमेरिकी सङ्घीय उड्डयन प्रशासनको सार्वजनिक नोटाम प्रणालीमा राखिएको उक्त सूचनामा बेइजिङ हवाई क्षेत्र नियन्त्रण अधिकारीलाई उद्धृत गरिएको छ।

जमिनदेखि असीमित उचाइसम्मको आकाशमा व्यावसायिक एयरलाइन्स, स्वीकृत व्यापारिक उडान तथा सेना, भन्सार, प्रहरी र अग्नि नियन्त्रण–उद्धार उडानबाहेक अरू सबै उडानमा रोक लाग्नेछ। रोयटर्सका अनुसार करिब २ लाख ८० हजार वर्ग किलोमिटरमा फैलिने यो क्षेत्रले बेइजिङ र थ्यान्चिनका साथै हबेई प्रान्तको धेरैजसो भूभाग समेट्नेछ। यो घेरा भित्री मङ्गोलिया, सान्सी, सानडोङ, लियाओनिङ र बोहाइ सागरको केही भागसम्म पुग्नेछ।

एक भौगोलिक अनुमानअनुसार यस क्षेत्रभित्र करिब १० करोड मानिस र दर्जनौँ विमानस्थल पर्छन्। गत जुन २६ मा बेइजिङको सबैभन्दा अग्लो भवन सिटिक टावरमा एउटा हल्का खेलकुद विमान ठोक्किएको केही महिनापछि यो कदम चालिएको हो। छुट पाएका उडानले पूर्वस्वीकृत उडान योजना कडाइका साथ पालना गर्नुपर्नेछ र हवाई यातायात नियन्त्रणसँग निरन्तर दोहोरो रेडियो सम्पर्क राख्नुपर्नेछ।

ती विमानमा निगरानी तथा पहिचान उपकरण जडान गर्नु पनि अनिवार्य गरिएको छ।