तेहरानमा हतियारसहित इरानी स्वयंसेवकको परेड

इरानी राजधानी तेहरानमा शुक्रबार सशस्त्र स्वयंसेवकहरूले परेड गरी शक्ति प्रदर्शन गरेका छन्। अमेरिका र इजरायलसँगको युद्ध ६ महिनाभन्दा लामो भइसकेका बेला समर्थक जुटाउने प्रयासका रूपमा यो प्रदर्शन गरिएको हो। परेडमा पुरुषहरू तरबार लिएर र महिलाहरू अनुहार ढाकेर कालाश्निकोभ राइफलसहित सहभागी भएका छन्।

सैनिक पोसाक लगाएका विद्यार्थीले इरानका पूर्वसर्वोच्च नेता अली खामेनीको ठूलो तस्बिरअगाडि हतियार लिएर मार्च गरेका छन्। इरानले अप्रिलको सुरुमा 'जानफदा' अर्थात् 'मातृभूमिका लागि बलिदान' नामको परिचालन अभियान थालेको थियो। इरानी अधिकारीहरूका भनाइमा ३ करोडभन्दा बढी मानिसले आवश्यक परे परिचालित हुन नाम दर्ता गराइसकेका छन्।

स्वयंसेवकलाई हतियार चलाउने र प्राथमिक उपचारको तालिम दिइँदै आएको अधिकारीले जनाएका छन्। अमेरिकी राष्ट्रपति डोनाल्ड ट्रम्पले इरानलाई पूर्ण रूपमा ध्वस्त पार्ने वा नपार्ने विषयमा विचार गरिरहेको बताउनुभएपछि यो परेड भएको हो। युद्धका क्रममा हरेक साँझ विभिन्न सहरमा समर्थकहरू 'प्रतिरोध' प्रदर्शनका लागि भेला हुँदै आएका छन्।

परेडमा सहभागी मेहदी मोहम्मदीले ट्रम्पको टिप्पणीको कडा विरोध गर्नुभएको छ। अधिकारीहरूले स्वयंसेवक जुटाउन नयाँ अभियान पनि थालिने जनाएका छन्। युद्धका कारण इरानमा आर्थिक कठिनाइ थपिएको छ।

गत डिसेम्बरमा महँगीविरुद्ध सुरु भएको प्रदर्शन सन् १९७९ को इस्लामिक क्रान्तिपछिको शासन व्यवस्थामाथि चुनौती बनेको थियो।