मकवानपुरका तीन पूर्वजिल्ला सभापति कांग्रेस केन्द्रीय सदस्यमा

नेपाली कांग्रेसको हालै सम्पन्न १५औँ महाधिवेशनबाट मकवानपुर जिल्लाका पाँच नेता केन्द्रीय सदस्यमा निर्वाचित हुनुभएको छ। तीमध्ये तीन जनाले जिल्ला सभापतिको जिम्मेवारी सम्हालिसक्नुभएको छ। पूर्वसभापति रामचन्द्र माइकल अर्याल, निवर्तमान सभापति ईन्द्रबहादुर बानियाँ र सभापति बुद्ध लामा केन्द्रीय समितिमा पुग्नुभएको छ।

अर्याल २०५७ सालदेखि २०६७ सालसम्म जिल्ला सभापति हुनुहुन्थ्यो र यसपटक उहाँ खस आर्य क्लस्टरबाट विजयी हुनुभएको छ। बानियाँ मकवानपुरका निवर्तमान सभापति हुनुका साथै बागमती प्रदेश सभापतिसमेत हुनुहुन्छ, र उहाँ लोकप्रिय मतसहित खुलातर्फबाट केन्द्रीय सदस्य बन्नुभएको छ। बानियाँपछि जिल्ला सभापति बन्नुभएका लामा भने आदिवासी जनजाति क्लस्टरबाट निर्वाचित हुनुभएको छ।

२०५७ सालयता मकवानपुर कांग्रेसको सभापति पदमा क्रमशः अर्याल, रघुरमण न्यौपाने, बानियाँ र लामा पुग्नुभएको थियो, जसमध्ये न्यौपानेबाहेक तीनै जना अहिले केन्द्रमा पुग्नुभएको छ। मकवानपुरबाटै उमा दाहाल र डा. आयुष बगाले पनि केन्द्रीय सदस्यमा जित हासिल गर्नुभएको छ।