चितवन कारागारमा यसपालि सामान्य रूपमा मात्र दसैँ

भोटेकोशी बाढीलगायत विपद्का कारण देश शोकमा रहेकाले चितवन कारागारका कैदीबन्दीले यस वर्ष दसैँ सामान्य रूपमा मात्र मनाउने भएका छन्। भदौ १० गते आएको बाढीपछि कारागारभित्र पनि पहिलेजस्तो उत्साह नरहेको उनीहरूले बताएका छन्। विगतका वर्षहरूमा कारागारभित्र खेलकुद, सांस्कृतिक कार्यक्रम, नाचगान र सामूहिक भोज आयोजना हुने गरेका थिए।

सामूहिक भोजका लागि राँगा, बोका, खसी र कुखुरा ल्याएर काट्ने चलन यस वर्ष नहुने कैदीहरूले बताएका छन्। व्यक्तिगत रूपमा मासु खान रोक नभए पनि सामूहिक भोज नहुने उनीहरूको भनाइ छ। १५ वर्षदेखि कैदमा रहेका एक कैदीले यसपटक शाकाहारी तरिकाले दसैँ मनाउने योजना रहेको जानकारी दिएका छन्।

मनोरञ्जनका कार्यक्रम नगरी परिवारसँग टीका लगाएर सामान्य रूपमा दसैँ मनाउने योजना कैदीबन्दीले बनाएका छन्।