हिमाली–पहाडी भेगमा आंशिक बदली, भोलि तराईमा बिहान कुहिरो

जल तथा मौसम विज्ञान विभागका अनुसार आज देशका हिमाली र पहाडी भू-भागमा आंशिक बदली रहनेछ भने भोलि बिहानपख तराईका केही स्थानमा हुस्सु र कुहिरो लाग्नेछ। विभागले हाल देशमा पश्चिमी वायुको आंशिक प्रभाव रहेको जनाएको छ। विभागले आज बिहान ८ बजे कात्तिक १ देखि ३ गतेसम्मको पूर्वानुमान जारी गरेको छ।

आज मधेश, कोशी, बागमती र गण्डकी प्रदेशको तराईमा आंशिक बदली हुनेछ, तर लुम्बिनी र सुदूरपश्चिमको तराईमा मौसम मुख्यतया सफा रहनेछ। हिमाली भेगका साथै कोशी, बागमती र गण्डकीका हिमाली र पहाडी क्षेत्रका एक-दुई ठाउँमा चट्याङसहित हल्का वर्षा वा हिमपात हुन सक्ने विभागले उल्लेख गरेको छ। भोलि कोशी, बागमती, गण्डकी र लुम्बिनीका हिमाली र पहाडी भेगमा आंशिक बदली हुनेछ भने कर्णाली र सुदूरपश्चिमका त्यस्ता भेगमा मौसम मुख्यतया सफा रहनेछ।

भोलि कोशी र गण्डकीका हिमाली क्षेत्रका एक-दुई स्थानमा हल्का वर्षा वा हिमपातको सम्भावना छ। प्रमुख सहरमध्ये सबैभन्दा बढी तापक्रम जनकपुरमा ३२ देखि ३४ डिग्री सेल्सियस रहने अनुमान छ। विराटनगर र नेपालगञ्जमा ३१ देखि ३३, वीरेन्द्रनगरमा २७ देखि २९ र काठमाडौँमा २५ देखि २७ डिग्री सेल्सियस तापक्रम रहने विभागले जनाएको छ।

पोखरामा २६ देखि २८ डिग्री सेल्सियस तापक्रमसँगै चट्याङसहित हल्का वर्षाको २० प्रतिशत सम्भावना छ। अन्य पाँच सहरमा भने वर्षाको सम्भावना शून्य प्रतिशत छ।