इरान–पाकिस्तान सीमामा व्यापार र आवागमन अस्थायी रूपमा बन्द

प्राविधिक समस्या र सुरक्षा चिन्ताका कारण इरान र पाकिस्तानबीच सीमापार आवागमन तथा व्यापार अस्थायी रूपमा रोकिएको छ। इरानी विदेश मन्त्रालयका प्रवक्ता इस्माइल बाघाईले केही प्राविधिक समस्या र सावधानीका उपाय आवश्यक परेकाले आवागमन स्थगित गरिएको शनिबार बताउनुभएको छ। इरानी समाचार संस्था इरनाका अनुसार दुवै देशका अधिकारीहरू नाका छिटो सामान्य बनाउन सँगै काम गरिरहेका छन्।

पाकिस्तानले शुक्रबारदेखि गब्द–रिमदान र तफ्तानका आधिकारिक नाकाबाट हुने व्यापार रोकेको छ। पाकिस्तानी पत्रिका डनका अनुसार वाणिज्य मन्त्रालयले अक्टोबर ३ मा जारी आदेश खारेज गरी नयाँ सूचना निकालेपछि व्यापार बन्द भएको हो। बलुचिस्तानका मुख्यमन्त्रीका सञ्चार तथा राजनीतिक मामिला सल्लाहकार शाहिद रिन्डले सुरक्षा बलियो बनाउन, तस्करी रोक्न र सीमा प्रशासन व्यवस्थित गर्न नाका बन्द गरिएको बताउनुभएको छ।