भारतको ग्वालियरमा अनियन्त्रित ट्रकले तीर्थयात्रीलाई ठक्कर दिँदा कम्तीमा १२ जनाको मृत्यु

भारतको मध्य प्रदेशस्थित ग्वालियरमा शीतला माता मन्दिर नजिकै अनियन्त्रित ट्रकले तीर्थयात्रीहरूलाई ठक्कर दिँदा कम्तीमा १२ जनाको मृत्यु भएको छ। दुर्घटनामा अन्य २७ जना घाइते भएका छन्।

धान बोकेको उक्त ट्रक अनियन्त्रित भएर मन्दिर नजिक रहेका तीर्थयात्रीहरूमाथि ठोक्किएको हो। थाहाखबरका अनुसार मन्दिर दर्शन गर्न लाइनमा बसेका तीर्थयात्रीहरूमाथि ट्रक खसेको थियो।

मृतक र घाइतेको सङ्ख्यामा भने स्रोतहरूबीच फरक छ। नेपाल समाचारपत्र, नागरिक र रातोपाटीले १२ जनाको मृत्यु र २७ जना घाइते भएको उल्लेख गरेका छन् भने थाहाखबरले कम्तीमा १३ जनाको मृत्यु भएको र ४० जना घाइते भएको जनाएको छ।

दुर्घटनाका घाइतेहरूको उपचार भइरहेको छ।