दसैँमा हराउँदै रातो माटो र कमेरोले घर पोत्ने चलन

दसैँअघि रातो माटो र कमेरोले घर पोत्ने परम्परा लमजुङका गाउँहरूमा लगभग हराइसकेको छ। अहिले कतैकतै मात्र माटो वा कमेरोले पोतिएका घर भेटिन्छन्। पहिले दसैँ आउनासाथ गाउँले माटो खोजेर ल्याउने, भित्ता पोत्ने, ढोका–झ्याल रँगाउने र बाटो सफा गर्ने काममा व्यस्त हुन्थे।

गाउँलेहरू मिलेर माटो ल्याउँथे र एकअर्काको घर पोत्न सघाउँथे, जसले गाउँलाई रङ्गीन र चहलपहलपूर्ण बनाउँथ्यो। केही वर्षयता सिमेन्टले प्लास्टर गरिएका र बजारका रङ लगाइएका घर बढेसँगै यो चलन क्रमशः कमजोर बनेको छ। आधुनिक घर निर्माण, सिमेन्टको प्रयोग, बजारको रङप्रतिको आकर्षण र बसाइँसराइ यसका मुख्य कारण भएको स्थानीय बताउँछन्।

यो परम्परासँगै दसैँको आगमनमा देखिने गाउँको पुरानो रौनक पनि घट्दै गएको छ।