चाडपर्वमा चोरी, ठगी र दुर्घटनाबाट जोगिन गण्डकी प्रहरीको आग्रह

गण्डकी प्रदेश प्रहरी कार्यालय पोखराले बडादसैँलगायत चाडपर्वका बेला हुन सक्ने चोरी, ठगी, लुटपाट र दुर्घटनाबाट जोगिन सर्वसाधारणलाई सार्वजनिक अपिल जारी गरेको छ। 'सभ्य बनौँ, सुरक्षित रहौँ, हर्षोल्लासका साथ चाडपर्व मनाऔँ' भन्ने नारासहित प्रहरीले आपसी सद्भाव कायम राखेर जिम्मेवार ढङ्गले पर्व मनाउन अनुरोध गरेको छ। चाडका बेला घर छाडेर बाहिर जाने, किनमेल गर्ने र सार्वजनिक स्थलमा भीड बढ्ने भएकाले सतर्कता अपनाउन भनिएको हो।

घर छाडेर बाहिर जाँदा झ्यालढोका राम्ररी बन्द गर्न, छिमेकीलाई घरको निगरानी गर्न भन्न र सीसीटीभी तथा आपत्कालीन साइरन जडान गर्न प्रहरीले सुझाव दिएको छ। भीड हुने मेला र बजारमा गरगहना, मोबाइल र नगद चोरी हुन सक्ने भएकाले आफ्नो सामानको सुरक्षा गर्न भनिएको छ। घरबाहिर बत्ती बालेर राख्न र अनधिकृत व्यक्तिसँग अनावश्यक घुलमिल नगर्न पनि अनुरोध गरिएको छ।

पटकाजस्ता विस्फोटक पदार्थ प्रयोग नगर्न र लाउडस्पिकर बजाएर अरूलाई बाधा नपुर्‍याउन पनि आग्रह गरिएको छ। मादक पदार्थ सेवन गरेर सवारी नचलाउन प्रहरीले चेतावनी दिएको छ।