कर्णाली प्रदेशको पर्यटन मन्त्रालयले एक वर्षमा झन्डै १५ करोड राजस्व उठायो

कर्णाली प्रदेशको उद्योग, पर्यटन, वन तथा वातावरण मन्त्रालयले आर्थिक वर्ष २०८२/८३ मा झन्डै १५ करोड रुपैयाँ राजस्व सङ्कलन गरेको छ। मन्त्रालयका सचिव अजित कुमार कर्णका अनुसार विभिन्न १५ शीर्षकबाट उठेको राजस्वमध्ये ठूलो हिस्सा वन क्षेत्रबाट आएको छ। वन क्षेत्रबाट करिब १२ करोड ७६ लाख रुपैयाँ र उद्योग क्षेत्रबाट करिब २ करोड १२ लाख रुपैयाँ सङ्कलन भएको छ।

वनको रोयल्टीबाट मात्रै करिब ५ करोड ८५ लाख रुपैयाँ उठेको छ भने वन क्षेत्रको अन्य आयबाट करिब ५ करोड ५४ लाख रुपैयाँ प्राप्त भएको छ। पर्यटन शुल्कबाट भने करिब ११ लाख रुपैयाँ मात्र उठेको छ। सरकारी सम्पत्तिको बहालबाट करिब १६ लाख रुपैयाँ आम्दानी भएको छ।

मन्त्रालयकै तथ्याङ्कअनुसार पछिल्ला सात आर्थिक वर्षमा कर्णालीका पर्यटकीय गन्तव्यमा करिब ५ लाख ४१ हजार आन्तरिक तथा बाह्य पर्यटक पुगेका छन्। सबैभन्दा धेरै, करिब २ लाख ९४ हजार जना सुर्खेतको बुलबुले ताल पुगेका छन् भने प्रदेश शहीद पार्कमा करिब १ लाख ४० हजार जनाले भ्रमण गरेका छन्। कर्णालीमा प्राकृतिक, धार्मिक, सांस्कृतिक र साहसिक पर्यटनको सम्भावना भए पनि पर्यटन पूर्वाधारका केही बहुवर्षीय आयोजना सुस्त गतिमा अघि बढिरहेका छन्।

करोडौँ रुपैयाँ लगानी भए पनि ती आयोजनाको भौतिक प्रगति सन्तोषजनक नभएको मन्त्रालयले नै जनाएको छ।